Banghay-Aralin:Bibliya ng mga Guro

Ang paggawa ng banghay-aralin ay isang napakahalagang bagay para sa isang guro dahil dito nakasalalay ang itatakbo ng kanyang pagtuturo sa mga mag-aaral. Ito ang kanyang maituturing na armas. Bilang paghahanda sa pagiging guro, kailangan malaman ng mga estudyanteng kumukuha ng edukasyon ang mga mahahalagang bahagi nito.
Ang banghay-aralin ay may tatlong uri: ang detalyadong banghay-aralin na mayroong mga gawain ng guro at mag-aaral, ang semi-detalyadong banghay-aralin na gawain ng guro lamang ang nakalagay at ang banghay-aralin na brif kung saan pabuod lamang ang pagkakalahad.Ang unang bahagi ng isang banghay-aralin ay ang mga layunin. Ito ay nahahati sa tatlo: una ay ang kognitibong layunin kung saan nasusukat ang utak ng isang mag-aaral,pangalawa ay ang apektibong layunin na sinusukat ang ating pagpapahalaga at ang pangatlo ay ang saykomotor na nauukol sa pagsasagawa ng mga natutunan.Ang layunin ay dapat na maging kongruwent sa gagawing evalwasyon. Pangalawang bahagi ay ang paksang-aralin, dito nakapaloob ang mga referens na ginamit ng guro,ang gagawing motiveysyon upang makuha ang interes ng mga mag-aaral, paglalahad ng aralin at malayang talakayan. Pang-apat ay ang evalwasyon kung saan may mga nakahandang pagsasanay ang guro para sa mga mag-aaral upang masukat ang kanilang nalalaman tungkol sa aralin pagkatapos ng talakayan. Ang panghuli ay ang kasunduan. Dito binibigyan ng guro ng mga tanong ang mga mag-aaral upang sila ay makapaghanda para sa susunod na aralin.
Kung walang banghay-aralin, hindi magiging maayos at epektibo ang pagtuturo. Ito ang dahilan kung bakit ito tinaguriang bibliya ng mga guro. Ang pagtuturo ay isang napakagandang propesyon, dahil naibabahagi mo ang iyong kaalaman sa mga batang nangangailangan nito. Ikaw, nais mo rin bang maging guro?

Journal vs. Blog

Sa pag-usad ng panahon at pag-unlad ng teknolohiya, maraming mga bagay ang naluluma at nauuso. Isang halimbawa nito ang journal at ang blog. Kung noon ay sa diary o journal lang natin naisusulat ang ating mga karanasan, opinyon at emosyon, ngayon ay maaari na natin itong ibahagi sa maraming tao sa pamamagitan ng internet blogging. Ngunit ano nga ba ang dahilan kung bakit mas maraming tao lalo na mga kabataan ang tumatangkilik sa blog kaysa sa journal na ating kinasanayan?

Ang journal ay isang notebuk na naglalaman ng rekord ng lahat ng mga pangyayari sa buhay ng isang tao, gayundin ang kanyang mga kuro-kuro, hinanaing at karanasan. Sa kabilang dako sa blog naman ay mabilis kang makakapag-post ng mga saloobin, makisalamuha sa mga tao at higit pa ng libre. Ang journal ay manwal na maituturing dahil gagamit ka ng bolpen o lapis upang ikaw ay makapagsulat samantalang ang blog ay napakadali sapagkat basta't may kompyuter ka, makagagawa ka agad ng isang artikulo at maaari mo pa itong i-edit at lagyan ng magandang settings dahil sa dami ng pagpipilian. Kung ang journal naman ay pansarili lamang, hindi ang blog. Kapag nai-post mo na ito, kahit sino ay maaari itong mabasa. Ngunit tulad ng lahat na bagay, ang blog ay mayroon ding mga limitasyon. Una, dapat ay mayroon kang kompyuter na may koneksyon ng internet hindi tulad sa journal na papel at panulat lamang ang kailangan. Pangalawa, ang blog ay medyo magastos lalo na kung wala kang sariling kompyuter kumpara sa journal na gaano man kahaba ang iyong maisulat ay wala kang gagastusin kahit magkano.

Ito ay ilan lamang sa pagkakaiba ng journal sa blog, ngunit ang bawat tao ay may kanya-kanyang interes kaya nasa atin pa rin ang pagpapasya kung alin ang nais nating gamitin, ang journal ba? o ang blog?